Omagi 2021 renda onur a las millis Svizras ch'èn s'engaschadas durant 100 onns per lur independenza e per schanzas egualas ed uschia per ina societad pli libra. Quai n'han ellas betg fatg mo per cuntanscher il dretg da votar e d'eleger da las dunnas ch'ellas han finalmain obtegnì il 1971. Las dunnas en Svizra èn s'engaschadas en ils secturs ils pli divers a moda curaschusa e cun ina perseveranza remartgabla.
Ad ellas è deditgada ina exposiziun en la citad veglia da Berna cun 52 purtrets da dunnas da tut ils chantuns e ina projecziun panoramica.
52 purtrets en la citad veglia da Berna (Herrengasse, Münstergasse e Münsterplatz) dals 7 da favrer fin als 30 da zercladur 2021
En noss pajais n'han las dunnas betg d'engraziar lur dretgs politics ad orrurs d'ina guerra, betg a scumbigls u a crisas politicas (sco per exempel en Finlanda, Germania, Austria euv.). Els n'è betg vegnids regalads ad ellas d'in pèr paucs politichers u derschaders. Na! Pir suenter blers acts da forza e blera lavur da persvasiun las èsi reussì d'acquistar ils dretgs politics d'ina maioritad dals umens e chantuns svizzers.
Quai ha duvrà temp.
Enturn il 1900 èn dunnas da tut las partidas e da tut las regiuns linguisticas s'unidas a la Lia da las societads svizras da dunnas. Collecziun da fotografias 103 : 981 : 05-03 da la Fundaziun Gosteli AGoF
